ОХУ-ын Москва хотод байрлах Сансрын музейд энэ сарын 26-нд Монгол, Вьетнам, Куба, ОХУ-ын сансрын нисгэгч нарын уулзалт болох гэж байна. Энэхүү уулзалт нь ардын дипломат бодлого эхэлсний 100 жилийн ойд зориулсан олон улсын форумын хүрээнд болж буй “Сансар огторгуй дахь бүтээлч түншлэл ба харилцан ашигтай хамтын ажиллагаа” хурлын нэгэн чухал арга хэмжээ болох юм байна.
Уулзалтад Фам Туан (Вьетнамын анхны сансрын нисэгч, ЗХУ-ын баатар), Жүгдэрдэмидийн Гүррагчаа (Монголын анхны сансрын нисэгч, БНМАУ, ЗХУ-ын баатар), Арнальдо Тамайо Мендес (Куба, Өмнөд Америкийн анхны сансрын нисэгч, ЗХУ-ын баатар), Антон Шкаплеров (ОХУ-ын баатар, сансрын нисэгч, Олон улсын сансрын станцын экипажийн дарга, “Дуудлага” /«Вызов»/ киноны жүжигчин), Владимир Джанибеков (Сансрын нисэгч, ЗХУ-ын хошой баатар), Александр Лавейкин (Сансрын нисэгч, ЗХУ-ын баатар) нарын сансрын нисгэгчид оролцох аж.
ЗХУ нь ардын дипломат бодлогын хүрээнд холбоотон, найрсаг харилцаатай улсуудынхаа иргэнийг сансарт нисэх боломж олгож, хамтарсан судалгаа хийж байсан. Энэ хүрээнд Чехословак, Унгар, Болгар, Польш зэрэг олон улсын иргэнийг сансарт нисгэсэн ч тэдгээр улсууд нь өдгөө Европын холбоонд харъяалагдаж байгаа тул уулзалтад очихгүй бололтой.
Манай Улсын хувьд Ж.Гүррагчаа 1981 оны гуравдугаар сард “Союз 39” хөлгөөр хөөрч долоо хоног ажилласнаар сансарт иргэнээ нисгэсэн дэлхийн 10 дахь улс болж байсан юм.
