Австралийн хоёр цэрэг 1916 онд Дэлхийн I дайнд оролцохоор далайд явж байхдаа захидал бичиж, лонхон дотор хийжээ. Дараа нь уг лонхоо далайд хаясан бөгөөд хэзээ нэгэн цагт хэн нэгэн тэдний сэтгэлийн үгсийг үр хойчид нь дамжуулна гэж найдсан бололтой. Тэгвэл 100 гаруй жилийн дараа уг лонх Австралийн баруун өмнөд хэсгийн Уортон эргээс олджээ. Тус бүс нутгийн оршин суугч Деб Броун гэр бүлийн хамт далайн эрэг цэвэрлэж байхдаа лонхыг олжээ. Лонхыг нээж үзэхэд захидал бага зэрэг норсон байсан ч унших боломжтой байсан аж. Улмаар захидлыг бичсэн хоёр цэргийн үр хойчтой холбоо тогтоож, өгсөн байна.
Дэб хэлэхдээ, захидалд хөгжилтэй зүйлсийг бичсэн байсан. Тэдний нэг цэрэг Малколм Невилл ээждээ хоол үнэхээр амттай байгаа талаар бичсэн байх бөгөөд “Бид Ларри шиг л жаргалтай байна” гэж бичсэн байв. Харамсалтай нь тэрээр уг захидлыг бичсэнээс хэдхэн сарын дараа, 28 насандаа тулалдааны үеэр амь үрэгдсэн нь тогтоогдсон. Харин нөгөө цэрэг болох Уильям Харли дайнаас амьд мэнд буцаж иржээ.
Невиллийн гэр бүл захидлыг олсонд үнэхээр гайхширсан байна. Харин Харлигийн ач охин өвөөтэйгөө дахин уулзсан юм шиг л мэдрэмж авсан гэв. Зарим мэргэжилтнүүдийн үзэж буйгаар, захидалтай лонх анх хэдэн долоо хоногийн турш хөвсөн ч эцэст нь эрэг дээр гарч, тэндээ 100 гаруй жил элсэнд булагдсан байж магадгүй.
