Зохиолч, яруу найрагч Б.Батрэгзэдмаагийн эхлүүлсэн “Цэцэгнээс төрөгсөд” роман уншигчдын гарт хүрч байна.
Энэхүү роман нь зохиолчийн дуусгаагүй бүтээл бөгөөд “Улбар” хэвлэлийн газраас “Дуусгаагүй зохиолын төрлийг нарийн тодорхойлох нь төвөгтэй боловч зохиолч бүх хувилбартаа “Цэцэгнээс төрөгсө /Lotus in Borns” монгол роман/mongolian novel гэж тодотгосон тул тэр хэвээр нь үлдээв” гэжээ.
Зохиолч уг романаа аргын тооллоор 2017 оны гуравдугаар сарын 2-ны өдөр эхлүүлж, сар гаруйн дараа буюу дөрөвдүгээр сарын 17-ны өдөр зохиолч Б.Сарантуяа руу цахим зурвасаар илгээхдээ “…Энэ бүлэгт түүх орж ирж байгаа юм. Түүнээс хойшоо түүхээс тасарна. Тавдугаар бүлэгт эргээд түүх орж ирнэ. Энэ бүлэг их зовлонтой байна. Чи нэг сайн хараадах даа” хэмээжээ. Зохиолчид бие бие рүүгээ бичиж буй бүтээлээ харилцан илгээж санаа бодлоо хуваалцдаг байсан гэх ба уг зохиолын 2017 оны дөрөвдүгээр сарын 17-ны өдрийн хувилбар ийн олджээ.
Мөн 2017 оны гуравдугаар сарын 2-ноос наймдугаар сарын 27-ны өдөр хүртэл нийт 989 цаг 19 минут ажилласан хоёрдугаар хувилбар, түүнчлэн 2020 оны наймдугаар сарын 26-наас арванхоёрдугаар сарын 22-ныг хүртэл 1241 цаг 54 минут ажилласан засамжилсан хувилбар олдсон аж. 2020 оны файлд “Цэцэгнээс төрөгсөд”-өөс гадна “Амитаба” (роман), “Хүннү”, “Модун хаан” (дэлгэцийн бүтээл) зэрэг дууссан болон дуусгаагүй эхүүд багтжээ.
Эдгээр гурван эхийг харьцуулсны үндсэн дээр энэ номд 2020 оны засамжилсан хувилбарыг үндсэн бичвэр болгон, төгсгөл хэсэгт 2017 оны хоёрдугаар хувилбарыг хавсаргасан байна.
2017 оны хоёр хувилбарын ялгаа нь зохиолч Б.Сарантуяад илгээснээс хойш нэмж бичсэн хэсгүүд байв. Харин 2020 оны засамжилсан хувилбарт зохиолын үүдэл санаа, зарим дүрийн нэр ба зорилго өөрчлөгдөж, зарим дүр хасагдаж, зохиолын үг хэллэг, найруулга чамбайрчээ. Тиймээс уншигчдад сонирхолтой, залуу зохиолчдод сургамжтай байх үүднээс эдгээрийг хамтатган хэвлэсэн аж.
