Нобелийн шагналт зохиолч Хан Ганы “Грек хичээл” роман нь уншигчдын гарт хүрлээ. Тус бүтээлийг Монсудар хэвлэлийн газраас албан ёсны эрхтэйгээр монгол хэлнээ хөрвүүлж, уншигчдад хүргэжээ.
Түүний уг бүтээлд сэтгэлийн далд шаналал бүхий эгэл жирийн хоёр хүн нэгэн мөчид учирч буйг өгүүлдэг.
Улам бүр бүдгэрсээр буй хараа, бүрхэг ирээдүйгээ хүлээх эрэгтэй болоод хамгийн дотнын хүмүүсээ алдсан нь багадсан юм шиг хэл яриа нь ч гацсан эмэгтэйн учрал. Эдгээрээс үүдсэн ганцаардал тэднийг бие биеэ олоход, бас бие биеэ ойлгоход хүргэсэн байлаа. Аажим аажмаар тэд өөрсдийг нь нэгтгэх чин сэтгэлийн гүн гүнзгий мэдрэмжийг олж нээнэ. Дотоод дуу хоолой нь гайхамшигтай үзэсгэлэнтэй хоршлоор тэднийг харанхуйн дундаас гэрэл гэгээ рүү, нам гүмээс илэрхийлэл, ойлголцол руу хөтлөн гаргаж ирнэ.
“Грек хичээл” бол хүмүүний харилцан ойлголцол, нандин дотносол руу хандсан хайрын илгээмж бөгөөд амьдралын утга учир, амьд байхуйн мөн чанарыг тод томруунаар амилуулсан бүтээл билээ.
