Өнгөрсөн аравдугаар сарын 28-ны өдрөөс эхлэн “Netflix”-ээр дамжуулан дэлхий нийтийн хүртээл болж буй “PHYSICAL: ASIA” нэвтрүүлэгт Монгол улсаа төлөөлөн оролцож буй багийн гишүүн Э.Лхагва-Очирыг Их Британийн “International Business Times” сайт энтертайнмент буландаа онцолжээ.
Түүнийг урт үст “Цус сорогч ханхүү” хэмээн нэрийдсэн байх ба интернэт орчинд түүний тухай яриа тасрахгүй байгаа тухай онцолсон байна. Хорин гаруй жилийн турш тайзнаа гялалзаж буй түүний өнөөг хүртэл босгосон карьерийн тухай дурдаад “Э.Лхагва-Очир нь 2023 онд CBS телевизийн “The Talk” шоунд зочин артистаар оролцож байсан бөгөөд 2024 онд алдарт зурагчин Дэвид ЛаЧапеллийн авсан Mercedes-Maybach S-Class ‘Cubist Scape’ машины сурталчилгаанд тоглосноороо олон улсад танигдсан нэгэн.
Олон салбарт өөрийгөө сорьж, үзэгчдийг байлдан дагуулж буй түүнийг шүтэн бишрэгчид нь чухам яагаад “Цус сорогч ханхүү” хэмээн нэрлэх болов? Түүний твиттер хуудсан дахь шүтэн бишрэгчид түүний цайвар царай, урт үс, агаар дээрх тэнцвэр, тэмцээний үеэр биеэ хянаж байгаа зэргийг нь харгалзан үзэн цус сорогчтой зүйрлэсэн бол “үзэсгэлэнтэй” царай, намбалаг байдал нь яг л ханхүү мэт байгааг онцлон ийнхүү нэрийджээ.
Хүнд хэцүү сорилтуудыг яг л театрт байгаа мэт гүйцэтгэж буй түүнийг шоуны дунд хэсэгт багийнхаа эрч хүч нь болж, гол дүр байсан. Бусад багууд эр бярдаа найдаж байсан бол тэд маш стратегич байж чадсан нь олны анхаарлыг ихээр татаж байна.
Шоу үргэлжлэх тусам онлайн орчинд түүний өрсөлдөх чадвар хийгээд гоо зүйн өвөрмөц байдлыг нь онцлон тус шоуны хамгийн загварлаг хийгээд сэтгэл татам, мартагдашгүй дүрүүдийн нэгээр нэрлээд байна” гэжээ.
