Монголд драмын урлаг улсын мэдлийн ганц театрын тайзнаас дайжин тэлж, өөр өөрийн илэрхийлэмж, шийдэл, уран бүтээлийн бодлого, үзэл санаа бүхий олон хувийн театрууд шил шилээ даран мэндэлж буй нь сайны дохио. Драмын урлаг Монголд либералчлагдаж байна. Үүний ойрын жишээ болохуйц шинэ тутам байгуулагдсан “Ger theatre” , “Гурван сүүдрийн театр” энэ сарын сүүлчээр жүжгээ тавих гэж байна.
Ингээд арваннэгдүгээр сарын 30-ны өдөр УИД-ийн долдугаар давхарт байрлах “NewYork Empire” ресторанд ганцхан удаа тавигдах “Кактус” бэсрэг жүжгийн зохиолын тухай товч бичвэрийг хүргэе.
Тэсэхгүй гэсэн болгоноо амьдралын эрхэнд тэсэж гарсан бол, гарч буй бол энэ танд зориулагдсан жүжиг юм. Зовлонг залгидаг, гомдлыг ч мөн адил залгидаг. Амьдрал ерөөс шударга бус гэдэгтээ эвлэрээд тэсэж туулсаар, давж гарсаар байгаа бол.
Ямар ч новшийн зүйлийн дараа чимээгүйхэн ганцаар уйлаад, хөмхийгөө зуун, худлаа инээн цаашаа амьдардаг бол?
Тийм ээ, би таны өөрөөсөө хүртэл үгүйсгэдэг өвдчихсөн эмзэг сэтгэлийг чинь олчихсон. Бугалчихсан их гомдлыг чинь мэдчихсэн. Мартчихсан, үгүйсгэгдсэн хүсэл мөрөөдлийг чинь ч бас. Яагаад ийм хатуу, харгис, тэвчээртэй хэзээ ч өвдөж байгаагүй мэт, амжилтаар дүүрэн байх гэж хичээдэг, алдаа гаргахыг үзэн яддаг, үргэлж мөнгө, эрх мэдэл, гоо үзэсгэлэн, алдар нэрийн хойноос хөөцөлддөг билээ!
-660x0.jpeg)
Яагаад гэвэл хайр энэрэл, хүлээн зөвшөөрөл байгаагүй учраас. Хэрэв хайрыг устай зүйрлэвэл амьдрал цөл мэт. Тийм үед хүн цэлэлзсэн гомдлоо огоорон сэтгэлийн чанад нуугаад хатууждаг. Өөрт тохиосон хэцүүг бусад нь ч бас давж туулах ёстой мэт аашилдаг. Бид эмзэг, сул дорой, ямар ч байдлаар оршин тогтносон хүлээн зөвшөөрүүлж, хайрлуулах эрхтэй шүү дээ. Хүндлүүлэх эрхтэй. Яагаад гэвэл хайр хаяа хязгааргүй, бүхнийг энэрдэг. Өнөөгийн бидний нийгэмд энэ “хайр”, жинхэнэ “хайр”, Д.Урианхай зохиолчийн бичсэн “Хайр бол далдад буй бурхан чанар байх” хэмээн таамагласан, тэр хайр үгүйрсэн. Одоо ахиад хэлье. Бид цөлд ургасан. Тиймээс бид өргөсөөр дүүрэн. Бидэнд буу тулгаж буй мэт ажил мэргэжил, амжилт, чадвар, гоо зүйд минь шалгуур тогтоосон. Гэр бүл болох, найз нөхөдтэй болох, нийгмийн ихэнх харилцаанд байр суурь нөлөөлнө. Бидэнд хүмүүс хэрхэн хандах нь үүнээс шалтгаална. Огиудас хүргэм л дээ. Гэхдээ цөөнгүй хүмүүс энэ зүйлийг туулсан, мэднэ гэж бодож байна. Энэ хандлага хүнийг “хүн” биш нийгэмд үйлчлэх “бараа” болгож байна. Уг нь бид эрх чөлөөт хүн шүү дээ.
