Хэрэв “Warner Bros” студийг худалдан авах бидний санал амжилттай хэрэгжвэл тус студийн кинонуудыг кинотеатруудаар үргэлжлүүлэн гаргана гэж “Netflix” стриминг үйлчилгээний компанийн гүйцэтгэх захирал Тед Сарандос мягмар гарагт Парист ярилцлага өгөх үеэрээ хэлжээ.
“Бид “Warner Bros”-ын студиудыг бие даан ажиллуулж, кинонуудыг урьдын адил кинотеатруудад гаргах болно” гэж тэрбээр Францын нийслэлд болсон нэгэн үйл ажиллагааны үеэр хэлээд, кино түгээлтийн талаарх өмнө нь хэлсэн үгс нь “хүмүүсийг төөрөгдүүлснийг” хүлээн зөвшөөрсөн байна.
Өмнө нь Т.Сарандос хэлэхдээ “кинотеатрт кино гаргах нь хоцрогдсон арга барил, стриминг хийх нь илүү дээр” гэсэн санааг илэрхийлж байжээ. Парисын театрт 2026 оны “Canal+” төслүүдийг танилцуулах үеэр Францын “Canal+” хэвлэл мэдээллийн группийн тэргүүн Максим Саада “Netflix”-ийн тэргүүнтэй ярилцсан байна.
“Netflix” ердөө 10 гаруй жилийн өмнөөс өөрийн гэсэн бүтээлүүдийг гаргаж эхэлсэн тул “манай уран бүтээлийн сан ердөө 10 жилээр хязгаарлагдаж байгаа бол “Warner Bros” 100 жилийн түүхтэй. Тиймээс бидний хэзээ ч хийж байгаагүй зүйлсийн талаар, тухайлбал кино түгээлтийн талаар тэд асар ихийг мэднэ” гэж тэрбээр тайлбарлажээ.
“Netflix” 12 дугаар сарын эхээр “Warner Bros. Discovery”-гийн ихэнх нэгжийг 83 тэрбум ам.доллароор худалдаж авах талаар тохиролцоонд хүрснээ зарласан юм. Гэсэн хэдий ч уг хэлэлцээрийг зохицуулагч байгууллагууд батлах эсэх нь эргэлзээтэй байгаагийн зэрэгцээ телевиз, киноны “Paramount Skydance” групп 108.4 тэрбум ам.долларын санал тавиад байгаа билээ.
Хэрэв “Netflix”-ийн санал амжилттай хэрэгжвэл дэлхийн хамгийн том медиа платформуудын нэг болох “HBO Max”-ийг эзэмших бөгөөд “Харри Поттер”, “Бөгжний эзэн”, мөн “DC Studios”-ийн супер баатруудын тухай кинонуудын каталогийн тэргүүн нүүрэнд бичигдэх юм.
