“Forbes” сэтгүүлээс 2025 оны “Дэлхийн хамгийн хүчирхэг 100 эмэгтэй” жагсаалтыг гаргажээ. Жагсаалтыг санхүү, медиа, нөлөөлөл, эрх мэдлийн хүрээ гэсэн дөрвөн гол үзүүлэлтэд үндэслэн улс төр, бизнес, соёл, глобал удирдлагын салбарт хамгийн том нөлөө үзүүлж буй 100 эмэгтэйг багтаасан байна.
Энэ жилийн жагсаалтад 25 улсын эмэгтэйчүүд багтжээ.
-Улс төр, бодлогын түвшинд өндөр нөлөө үзүүлж буй эмэгтэйчүүдээр Европын комиссын тэргүүн Урсула фон дер Лейен, Европын Төвбанкны ерөнхийлөгч Кристин Лагард, Японы анхны эмэгтэй Ерөнхий сайд Санаэ Такаичи, Намибийн Ерөнхийлөгч Нетумбо Нанди Ндайтва,
-Соёл, энтертайнмент салбарын жагсаалтад өөрийн уран бүтээл, тоглолтоороо хөрөнгөжсөн Тэйлор Свифт, “Skims” брэндийг хамтран үүсгэн байгуулагч, 350 сая дагагчтай “нөлөөлөгч” Ким Кардашьян,
-Технологийн салбарын нөлөө бүхий эмэгтэйчүүдээр хиймэл оюун, чип үйлдвэрлэлийн салбарын гол тоглогчдын нэг AMD-ийн гүйцэтгэх захирал Лиза Су, “Nvidia”-гийн санхүү хариуцсан захирал Колетт Кресс, “Мета” компанийн санхүү хариуцсан захирал Сюзан Ли нарыг нэрлэв.
Тус жагсаалт нь эмэгтэйчүүд олон улсын бизнес, улс төр, соёл, технологийн салбарт гол нөлөө үзүүлж, ирэх жилүүдэд дэлхийн хүчний бүтэц, хөгжлийг тодорхойлон харуулж байгааг “Forbes” онцлов.
