Ардын жүжигчин, алдарт баритон Э.Амартүвшин “Opera star-International Opera Awards-2025”-аас “Шилдэг баритон” шагналыг хүртлээ.
Ингэснээр тэр анх 2020 онд авахаар болсноосоо хойш таван жилийн дараа энэхүү нэр хүндтэй шагналын эзэн болж байна. Тодруулбал, одоогоос 15 жилийн өмнө эл шагналыг олгож эхэлсэн бөгөөд Э.Амартүвшин 2020 онд шилдэг баритоноор шалгарч, 2021 онд АНЭУ-ын Дубай хотод авах байсан ч дэлхий даяар тархсан коронавирусын цар тахлын улмаас шагналаа авч чадалгүй хойшилсон байдаг. Улмаар дахин 2023 онд авахаар зарласан боловч мөн ёслолын ажиллагааг цуцалсан мю. Эцэст нь дахин 2025 онд албан ёсоор цомоо Италийн нийслэл Ром хотноо хүлээн авлаа.
Манай дуучны хувьд дэлхийн шилдэг театруудын тайзнаа тогтмол уригдан тоглож буй. Мөн суут Ж.Вердийн бүтээлүүдийг хоолойн хүч, жүжиглэлт зэрэг бүхий л талаараа төгс амилуулж ирснийг мэргэжилтнүүд тодотгодог. Цаашлаад зөвхөн дуулах бус, түүний урлагт үзүүлэх нөлөө, шинэ үеийн дуучдад үзүүлж буй үлгэр жишээг нь үүгээр үнэлж буй бөгөөд дэлхийн хэмжээний баритон болсны бас нэгэн баталгаа юм.
