ЗХУ-ын Төрийн шагналт, ОХУ-ын Ардын жүжигчин Вера Валентиновна Алентова 83 насандаа таалал төгслөө.
Вера Быкова (1969 оноос хойш эхийнхээ Алентова гэж овгийг авсан) 1942 оны хоёрдугаар сарын 21-нд Архангельск мужийн Котлас хотод төржээ. Түүний эцэг Валентин Михайлович Быков (1917-1946) болон эх Ирина Николаевна Алентова (1917-1988) нар хоёулаа жүжигчин байв.
Вера Алентова 1961-1965 онд Москвагийн Театрын урлагийн сургуулийг В.Немирович-Данченкогийн нэрэмжит урланд суралцаж төгсөөд 1965 онд А.Пушкины нэрэмжит Москвагийн драмын театрт жүжигчнээр ажиллаж, уран бүтээлийн гараагаа эхэлжээ.
Тэрбээр театрын уран бүтээлээс гадна дэлгэцийн олон уран бүтээлд дүрээ мөнхөлсөн театр, кино, телевизийн жүжигчин, театрын багш хүн юм.
Монголчууд Вера Алентоваг өөрийн нөхөр Владимир Меньшовын найруулсан “Амьдрал нулимсанд дургүй” (орос. Москва слезам не верит) киноны гол дүр болох Катя Тихомировагийн дүрээр нь андахгүй. Түүний гол дүрд нь тоглосон энэхүү уран бүтээл 1981 онд “Оскар”-ын кино наадмын гадаад хэлээрх шилдэг киногоор шалгарч байлаа.
