“Netflix”-ийн “Physical Asia” нэвтрүүлгийн араас дахин нэг шоугаар шар тивийнхэн өрсөлдөх гэж байна.
Энэ удаад БНСУ-ын алдарт CBS телевизийн бүтээл “Veiled Cup” нэвтрүүлэг Азийн 9 улсын 27 оролцогчтойгоор нэгдүгээр сарын 11-ны ням гарагаас “Netflix”-ээр цацагдах аж.
Өмнөд Солонгосын жүжигчин, продюсер, радиогийн хөтлөгч гэдгээрээ олонд танигдсан Чой Даньел олон улсын дуучдыг оролцуулсан нэвтрүүлэг хийхээ өнгөрсөн онд мэдэгдэж байв.
Уг нэвтрүүлгийн анхны хувилбар 2018 онд “Blind Musician” нэрээр гарч байсан бол 2023 онд нэрээ “Veiled Cup” болгож өөрчилжээ.
Харин өнгөрсөн оноос “Global Veiled Musician” нэрээр Азийн 13 оронд шалгаруулалт явагдаад 8 нь эцсийн шатанд тунаж үлдсэн байна. Тодруулбал, зохион байгуулагч орон болох БНСУ-аас гадна Япон, БНХАУ, Тайланд, Вьетнам, Филиппин, Монгол, Лаос, Индонезын тус бүр шилдэг гурван оролцогч шалгарсан байна.
