Улсын хүүхэд, залуучуудын театрынхан шинэ оны анхны уран бүтээлээрээ үзэгчидтэй уулзаж байна. Тус театрынхан хүүхэд, залуусын шимтэн үзэх дуртай дэлхийн алдарт “Аддамсын гэр бүл” хөгжимт жүжгийг албан ёсны эрхтэйгээр толилуулж буй юм. Монголд анх удаа тавигдаж буй тус жүжиг нь инээдмийн, аймшгийн, мюзикл төрөл хосолсноороо онцлогтой.
“Аддамсын гэр бүл” гаднаасаа инээдэм наргиа, хар бараан бүхнээр дүүрэн мэт харагддаг ч үнэндээ тэдний дотор хамгийн энгийн, чин үнэнч сэтгэл оршиж байдаг билээ. Улмаар энэ жүжиг нь нийгмийн хүнд сэдвүүдийг, тэр дундаа ялгаатай байдал нь алдаа бус, энгийн л зүйл гэдгийг хөнгөн инээд, хөгжим, хөдөлгөөнөөр дамжуулан хүргэж буйгаараа давуу талтайг театрын уран бүтээлчид онцолсон. Гэр бүл гэдэг чиний хэн болохыг асуухгүйгээр хайрладаг хүмүүсийг хэлдэг. Үүнийг ойлгуулах жүжиг бол “Аддамсын гэр бүл” юм.
Сонгинохайрхан дүүрэгт байрлах Улсын хүүхэд, залуучуудын театрын “Аддамсын гэр бүл” уран бүтээлийг үзэхийг хүсвэл тасалбарыг ticket.mn-ээр худалдан авах боломжтой бөгөөд жүжгийг энэ нэгдүгээр сарын 31, хоёрдугаар сарын 7, 8-д тус тус тоглоно.
Жүжгийн уран сайхны удирдагчаар Ардын багш, Урлагийн гавьяат зүтгэлтэн Н.Ганхуяг, ерөнхий продюсер, найруулагчаар Гавьяат жүжигчин Н.Ариунболд нар ажилласан бол гол дүрийн жүжигчин Гомезийг А.Ганзориг, Мортисиаг Х.Азбуян, Уэнсдэйг Ц.Болорцэцэг, Пагслейг Э.Болорцэцэг, Лукасыг О.Энхбилэг нар амилуулж байна.
