Кино урлагийг дэмжих сангаас хэрэгжүүлж буй төслийн агуулга, нийгмийн хүртээмжийг сайжруулах зорилгоор дараах утгыг оруулжээ.
Монголын үндэсний кино зөвлөлийн мэдээлснээр, үндсэн гэрээний 11 дүгээр зүйлийн 11.16 дахь заалтыг шинэчлэн найруулж, кино уран бүтээл нь Монголын түүх, соёл, зан заншил, өв уламжлалыг тодорхой, харагдахуйц байдлаар тусгасан байх шаардлагыг нэмэв.
Шинэчилсэн заалтад:
- Монголын түүх, соёл, зан заншил, үндэсний онцлогийг илэрхийлэх элементийг заавал оруулах, Чингис хааны хөрөг, морин хуур, үндэсний хувцас зэрэг үндэсний бэлгэдлийг уран бүтээлд тодотгож харуулах
- Тэгш хүртээмжийг бий болгох зорилгоор сонсголын бэрхшээлтэй иргэдэд зориулан монгол хэлээр хадмал орчуулга байрлуулах, харааны бэрхшээлтэй иргэдэд зориулсан үйл хөдлөл, дүрслэлийг тайлбарласан нэмэлт синхрон дуу оруулалтыг хийсэн хувилбарыг бэлтгэн ирүүлэх үүрэгтэй
Энэхүү өөрчлөлт нь үндэсний кино уран бүтээлээр дамжуулан Монголын түүх, соёлын онцлогийг илүү тод харуулах, үндэсний бахархлыг төлөвшүүлэхийн зэрэгцээ бүх иргэнд тэгш хүртээмжтэй соёлын бүтээгдэхүүн хүргэх зорилготой юм.
