Говь-Алтай аймгийн Эрдэнэ сумын нутагт археологийн үнэт олдвор болох хашлага бүхий хүн чулуу бий. Уг дурсгалыг нутгийнхан “Үхэр чулуутын хөндий” хэмээн нэрлэдэг.
Дөрвөлжин тахилын байгууламжийн төв хэсэгт урагш 45 градусын налуутай хөшөө чулуу байрлах бөгөөд уг байгууламжийн зүүн талд хашлага налсан хүн чулуу бий. Хүн чулууны толгойг бөөрөнхий хэлбэртэй болгон зассан нь түүнийг хүн чулуу болохыг илтгэх бөгөөд нүд, хамар, гар зэрэг хүний эрхтнийг дүрсэлсэн ямар ч шинж тэмдэг ажиглагдахгүй.
Хүн чулуу нь 105 см өндөр, 27 см өргөн, 13 см зузаантай. Түүний зүүн талын хашлага чулуун дээр гурван янгирын дүрсийг доош харуулан сийлжээ. Харин хөшөө чулуу нь 228 см өндөр, 57 см өргөн, 6 см зузаантай бөгөөд хашлага байгууламж нь нийтдээ 270×270 см хэмжээтэй байна.
Говь-Алтай аймгийн нутаг дэвсгэрт археологийн хайгуул, судалгаа хийж, түүхийн олон үед холбогдох булш, хиргисүүр, хөшөө чулуу, буган чулуун хөшөө, хүн чулуу, хадны зураг зэрэг нийт 4951 дурсгалыг шинээр илрүүлж, баримтжуулан бүртгэсэн судалгаа бий.
Эрдэнэ сум аймгийн төвөөс 250 км орчим, Улаанбаатар хотоос 946 км зайд оршдог.
