Холливудад “Warner Bros”-ийн студи, стриминг салбарыг худалдан авахын төлөөх өрсөлдөөнийг “Paramount Skydance”, “Netflix” хоёр өрнүүлж байгаа. Тэгвэл “Paramount” компани “Warner Bros”-ийг худалдан авахын тулд саналаа сайжруулсан байна. “Netflix” өнгөрсөн жил мэдэгдэл хийхдээ “Warner Bros”-ийг худалдан авахаар 82.7 тэрбум ам.долларын хэлцэл хийсэн гэсэн юм. Харин “Paramount” 108.4 тэрбум ам.доллар санал болгоод байгаа.
“Paramount” 108.4 тэрбумын дүнгээ нэмээгүй ч 2027 оноос эхлэн “Warner Bros”-ийн “Netflix”-тэй хийсэн хэлцлийг цуцлах хүртэл хувьцаа эзэмшигчдэд нэгж хувьцаанд 25 цент бодож урсгал мөнгө өгөхийг санал болгожээ. Энэ нь нийтдээ 650 сая ам.доллар болно. Мөн “Warner Bros” хэлцлээ цуцалбал “Netflix”-д төлөх ёстой 2.8 тэрбум ам.долларыг төлөх санал дэвшүүлсэн байна.
Хэдийгээр “Paramount” хувьцаа эзэмшигчдэд илүү их мөнгө амлаж байгаа ч “Warner Bros”-ийн ТУЗ хувьцаа эзэмшигчдээ “Netflix”-ийн хэлцлийг дэмжихийг уриалсан. Аргаа барсан “Paramount” компани “Warner Bros”-ийг шүүхэд өгч, өөрсдийнх нь тавьсан санал илүү дээр байхад яагаад “Netflix”-ийг сонгохыг уриалж байгааг тайлбарла хэмээн шаардсан юм.
