Ховд аймгийн нутаг дэвсгэр дэх хүн чулуун хөшөөний нэг бол Бүдүүн харгайт цахирын өвөлжөөний хүн чулуун хөшөө юм.
Тус хөшөө нь Булган сумын нутагт, далайн түвшнээс дээш 1822 метрийн өндөрт байрладаг.
Уг хүн чулуу нь Бүдүүн харгайтын голын дунд хэсэгт өвөлжөөний хойд талд байгаа бөгөөд 2х2.3 мерт хэмжээтэй тахилын байгууламжийн урд талд босгожээ.
Хүн чулууны өндөр 93 см бол өргөн 32 см, зузаан 35 см юм.
Түрэгийн үед холбогдох тус хүн чулуун хөшөөг саарал өнгийн боржин чулуугаар урласан. Ингэхдээ хүний нүд, чих, хөмсөг, ам, сахал зэргийг сийлжээ. Мөн баруун гарт хундага бариулсан ба зүүн ташаандаа сэлэмтэй. Дүрслэл нь ихэд бүдгэрсэн тухай Түүхийн ухааны докторант Х.Бямбасүрэн “Ховд аймгийн нутаг дэвсгэр дэх хүн чулуун хөшөөд” хэмээх номдоо дурдсан байна.
Сонирхуулахад, Ховд аймгийн Булган сум нь байгаль, цаг уурын эрс, тэрс уур амьсгалтай говийн цөл, цөлөрхөг хээрийн бүс, өндөр уулын бүс, ойт хээрийн бүс хосолсон байгалийн үзэсгэлэнт газар нутагтай.
Тус сум нь байгалийн ховор, нэн ховор, ховордсон ан амьтан, ургамал ургасан өвөрмөц эко системтэй бүс нутаг юм.
Булган сум 10 мянга гаруй хүн амтай. Үүний 80 гаруй хувь нь торгууд угсаатан юм. Тус сум нь Улаанбаатар хотоос 1800 орчим км, Ховд аймгийн төвөөс 380 гаруй км зайд оршдог.
