Сонгодог артхаус киног дэлгэрүүлэх зорилготой “Алтан хальс” холбооноос долоо хоног бүрийн бямба гаригт зохион байгуулдаг “Dreamers’day” буюу “Мөрөөдөгчдийн өдөр” кино өдөрлөгөөр энэ удаад Андрей Тарковскийн суу билэг нь дурсамж, бодролоос нь ундран төрсөн “Зеркало” буюу “Толь” хэмээх бүтээлийг толилуулахаар бэлджээ.
Энэ киног мэдрэмжийн түвшиндээ, ямар нэг логик бодромжийг таягдан хаяж хүлээн авч чадах гэмээнэ энэ кино толь шиг тунгалаг гэдгийг ойлгох болно. Энэхүү толинд өнгөрсөн, одоо, ирээдүй, дурсамж, хайр, гэмшил, өршөөл, үзэсгэлэн гоо, санагалзал, тахил бүгд туссан ажээ. Уг кино нь зүгээр ч нэг аугаа хэмээгдсэн кино биш, энэ нь цэвэр кино урлаг үнэн дүр төрхөөрөө оршин буй явдал юм. Энэ киног бусад доод зиндааны кинонуудтай харьцуулах нь утгагүйгээс гадна боломжгүй зүйл. Сайн уран барилга гэдэг чулуугаар босгосон хөгжим байдагтай адил энэ кино бол гэрэл сүүдрийн яруу найраг аж.
Уг кино энэ сарын 26-ны бямба гаригт 14.00 цагт Энхтайван найрамдлын ордонд Орос хэл дээр Монгол хадмалын хамт гарах юм. Тасалбарын үнэ 2000 төгрөг юм.
Г.Даша
