Монгол зургийн орчин үеийн сэтгэлгээний онцлогийг харуулсан “Best of Mongol zurag” үзэсгэлэнг Монголын урчуудын эвлэлийн “Арт” галерейд өнгөрсөн баасан гараг /2026.03.20/-т нээлээ.
Үзэсгэлэнд 30 гаруй уран бүтээлчийн 60 орчим бүтээлийг дэлгэж, олон нийтэд хүргэж байна. Үзэсгэлэнгийн хүрээнд Монголын уран зургийн галерейд үзэсгэлэнгээ гаргах эрхийг Дүрслэх урлагийн академийн багш, судлаач Г.Амарсанаа, Монгол арт галерейд үзэсгэлэнгээ гаргах эрхийг зураач Х.Тэнүүн нарт тус тус гардуулав.
Мөн “Бий контемпорари” арт галерейн нэрэмжит шагналын эзнээр зураач Ч.Цогбилиг, Ардын зураач, Төрийн соёрхолт Ү.Ядамсүрэнгийн нэрэмжит сангийн шагналыг Монгол Улсыг төлөөлөн Венецийн биеннальд оролцох уран бүтээлч Б.Номин, Г.Гэрэлхүү болон Ж.Мөнхжаргал, О.Үржинханд нар хүртлээ.
Түүнчлэн “Монгол зураг” нийгэмлэгээс батламж, мөнгөн шагналаар Дүрслэх урлагийн академийн IV дамжааны оюутан С.Ёндонсамбуу, уран бүтээлч О.Оюунчимэг нарыг шагналаа. Үзэсгэлэн энэ сарын 31-ний өдрийг хүртэл үргэлжлэх юм.
”Монгол зураг” нийгэмлэг 2002 оноос нүүдэлчдийн уламжлалт уран зургийн өв соёлыг судлах, олон улсад сурталчлан таниулах үйл ажиллагаа явуулж байгаа аж.
