Жүжигчин Алек Болдуин 2021 онд “Rust” киноны зураг авалтын үеэр болсон галт зэвсгийн хэрэгтэй холбоотойгоор иргэний шүүхэд дуудагдаж магадгүй боллоо. Тодруулбал, уг кинонд кинонд гэрэлтүүлэгчээр ажиллаж байсан Сергей Светной жүжигчин Болдуиныг хайхрамжгүй үйлдлээсээ болж хүний аминд хүрсэн гэж буруутган, шүүхэд нэхэмжлэл гаргасан байна. Улмаар шүүгч уг нэхэмжлэлийг шүүхээр хэлэлцүүлэх боломжтой гэж шийдвэрлэжээ.
Хэрэг Нью-Мексико мужид 2021 онд гарсан. Зураг авалтын бэлтгэл ажлын үеэр Болдуины бариж байсан жижиг тайзны гар буу гэнэт идэвхжиж, галласан байна. Улмаар зураглаач Халина Хатчинс амь насаа алдаж, найруулагч Жоэл Соуса шархадсан. Болдуин өөрийгөө гох дарсан гэдгээ үгүйсгэдэг бөгөөд сумтай байсныг нь мэдээгүй гэж мэдүүлсэн.
Өмнө нь амь хохирогчийн гэр бүл түүнийг шүүхэд өгсөн ч холбогдох эрүүгийн хэргийг 2024 онд хэрэгсэхгүй болгосон байна.
Светной бууны суманд бараг өртөх шахсан гэж мэдэгдээд, Болдуин болон кино продакшн компанийг бууны аюулгүй ажиллагааны дүрэм зөрчсөн гэж буруутгаж байна. Лос-Анжелес хотын Дээд шүүхийн шүүгч Морис Лейтер хайхрамжгүй байдал болон сэтгэл санаанд санаатай хохирол учруулсан гэх нэхэмжлэлүүдийг үргэлжлүүлэн хэлэлцэхийг зөвшөөрсөн боловч халдсан гэх нэхэмжлэлийг хэрэгсэхгүй болгожээ.
Хэрэв талууд тохиролцоонд хүрэхгүй бол иргэний хэргийн шүүх хурлыг аравдугаар сарын 12-нд урьдчилсан байдлаар товлоод байна.
Өмнө нь Болдуин болон киноны продюсерууд талийгаач Халина Хатчинсын гэр бүлтэй холбоотой өөр нэг нэхэмжлэлийг эвлэрлийн журмаар шийдвэрлэсэн байдаг. Болдуинд холбогдох эрүүгийн хэргийг 2024 онд Нью-Мексико мужийн шүүгч хэрэгсэхгүй болгосон. Учир нь цагдаа болон прокурорууд нотлох баримтыг өмгөөлөгчдийн талд өгөөгүй гэж үзсэн юм. Харин киноны зэвсэг хариуцагч Ханна Гутьеррес-Рид нь болгоомжгүйгээр хүний амь насыг хохироосон гэмт хэрэгт буруутгагдаж, 2024 онд 18 сарын хорих ял сонссон байна.
