Японы мангагийн домогт уран бүтээлч Осамү Тэзүкагийн анимэ бүтээлүүдтэй холбоотой, өмнө нь нийтлэгдээгүй хэд хэдэн баримт бичиг “Tezuka Productions” компанийн эзэмшилд байгааг “Jiji Press” агентлаг мэдээлжээ.
Эдгээр материалд Тэзүкагийн өөрийн гараар зурсан эх зураг, сториборд (кадрын төлөвлөлт), дүрийн загварууд багтсан аж. Тэдгээр нь 1999 онд хэвлэгдсэн долоон боть сторибордын эмхэтгэл болон өмнөх бусад хэвлэлүүдэд ороогүй байжээ.
Шинээр олдсон эдгээр анимэйшний материалуудыг зургадугаар сарын 17-нд “Genkosha” хэвлэлийн газраас гаргах шинэ номд багтаах аж.
2022 оноос хойш “Tezuka Productions” нь “Agency for Cultural Affairs”-ын санхүүжилттэй төслийн хүрээнд анимэйшний материалуудыг архивжуулах ажлыг эхлүүлсэн байна. Энэ оны гуравдугаар сар гэхэд нийт 130 000 хуудсыг дижитал хэлбэрт шилжүүлж, сэргээн засварлах ажлыг дуусгажээ.
Тэзүка олон тооны алдартай анимэ цуврал бүтээснээрээ Японы анимэ салбарын суурийг тавьсан хүн гэж үнэлэгддэг. Тэрээр амьдралынхаа эцсийн мөч хүртэл идэвхтэй уран бүтээлээ үргэлжлүүлсэн юм.
Шинээр олдсон баримтууд нь түүний шинэ илэрхийллийн хэлбэрийг тасралтгүй эрэлхийлж, туршилт хийдэг байсан байдлыг харуулахаас гадна анимэ бүтээх үйл явцын бүх шатанд биечлэн оролцдог байсныг илэрхийлж буй аж.
1963 онд анх цацагдсан Японы анхны телевизийн анимэ цуврал болох “Astro Boy”-д Тэзүка үйлдвэрлэлийн зардал, хугацааг багасгахын тулд анимэйшний кадрын тоог цөөрүүлэх шинэ аргыг нэвтрүүлсэн. Тус цуврал хамгийн өндөр хандалттай үедээ 40 хувийн үзэгчийн рейтингтэй болж урьд өмнө байгаагүй амжилт олсон. Мөн долоо хоног бүр 30 минутын нэг анги гаргах, алдартай мангаг анимэ болгон хувиргах зэрэг өнөөг хүртэл үргэлжилж буй анимэгийн форматыг тогтоож өгчээ.
“Digital Hollywood University”-ийн тусгай томилгоот дэд профессор Нобүюки Цүгатагийн хэлснээр өнөөг хүртэл хадгалагдан үлдсэн эдгээр анимэнүүд нь “дэлхийд маш ховор үзэгдэл” бөгөөд Японы анимэйшний өвөрмөц байдлыг бий болгосон юм.
