Киргизийн нийслэл Бишкек хотноо дөрөв дэх удаагаа зохион байгуулж буй Олон улсын кино наадам эхэллээ.
Тус наадамд Киргизийн Соёл, мэдээлэл, залуучуудын бодлогын яамны Кино урлагийн газар болон кино наадам зохион байгуулагч хорооны урилгаар Монгол Улс албан ёсны зочин орноор оролцож байгаа юм. Кино наадмыг нээх ёслолд Монгол Улсаас Бүгд Найрамдах Киргиз Улсад суугаа Онц бөгөөд Бүрэн эрхт Элчин сайд Д.Тэгшжаргал оролцож, үг хэлжээ.
Энэ удаагийн наадмын хүрээнд “Монгол кино өдрүүд” өдөрлөг Бишкек хотын “Ала-Тоо” кинотеатрт өчигдөр /2026.06.09/-өөс эхэлсэн байна. Кино өдрүүдээр найруулагч Б.Батдэлгэрийн “Шар гэгээ”, найруулагч Ж.Сэнгэдоржийн “Чимээгүй хотын жолооч”, найруулагч П.Лхагвадуламын “Сэр сэр салхи” киног үзэгчдийн хүртээл болгох ажээ. Найруулагч П.Лхагвадуламын хувьд дөрөв дэх удаагийн Бишкекийн Олон улсын кино наадмын шүүгчээр ажиллаж байна.
