“Orange” энтертайнмент, VOO, “Absolute” пикчерсийн хамтын бүтээл “Орь дуу” олон ангит кино үзэгчдийн хүртээл болж буй. “Orange” энтертайнментийн 10 жилийн ойд зориулсан бүтээсэн эл олон ангит кино зургаан ангитай бөгөөд П.Дэлгэрбаяр найруулж, гол дүрүүдэд Гавьяат жүжигчин Д.Ганцэцэг, жүжигчин Б.Батмэнд, залуу жүжигчин, бүжигчин Б.Мөнхнаран нарын уран бүтээлчид тогложээ.
“Харанхуйгаас сонсогдох ОРЬ ДУУ” киног үзэх ТАВАН шалтгааныг хүргэе.
НАЙРУУЛАГЧ П.ДЭЛГЭРБАЯРЫН ӨВӨРМӨЦ ШИЙДЭЛ, СЭТГЭЛ ЗҮЙН ӨНГӨ АЯС
Найруулагч П.Дэлгэрбаяр уран бүтээл бүрээрээ сэтгэл зүй, нийгмийн далд асуудлуудыг хөнддөг. Түүний триллер, детектив болон сэтгэл зүйн драмыг хослуулах өвөрмөц арга барил нь энэ киног улам сонирхолтой болгосон.
Б.МӨНХНАРАНГИЙН ШИНЭ ӨНГӨ ТӨРХ
Киноны гол дүр болох Хадааны дүрийг Б.Мөнхнаран бүтээсэн. Мөн найруулагч П.Дэлгэрбаяр кино зохиолоо түүнд зориулж бичсэн.Түүний хувьд ОХУ-д балетын жүжигчнээр суралцаж, УДБЭТ-т балетын жүжигчнээр ажиллаж байсан. Сүүлийн жилүүдэд дэлгэцийн урлагт хүч үзэж буй. Хадааны дүрээр эмэгтэй хүний дотоод хүч, тэвчээр, эмзэг бөгөөд хүчирхэг байдлыг хэрхэн амилуулсныг харах боломжтой.
ЭМЭГТЭЙЧҮҮДИЙН ДУУ ХООЛОЙ
“Харанхуйгаас сонсогдох орь дуу” кино хүмүүсийн тэр бүр ил гаргаад байдаггүй амьдралын харанхуй тал, эмэгтэйчүүдэд тулгардаг сэтгэл зүйн болон нийгмийн дарамт, тэмцлийг маш зоригтойгоор хөндсөнөөрөө онцлогтой.
ХҮН БҮРИЙН ДОТОР ХАРАНХУЙ БИЙ
Дүр бүрийн дотор нуугдаж буй айдас, нууц, өшөө авалт, гэмшил зэрэг хүний сэтгэл зүйн хамгийн нарийн, харанхуй талуудыг ухаж харуулдаг. “Миний дотор ч бас ийм харанхуй орон зай бий билүү” гэж өөрөөсөө асуухад хүргэхээр өрнөлтэй.
ТУРШЛАГАТАЙ КИНО БАГИЙН БҮТЭЭЛ
Монголын кино урлагийн зах зээлд өнгө төрх, техник, дуу дүрсний чанараараа тэргүүлж буй “Orange Entertainment”-ийн 10 жилийн ойд зориулан энэхүү кино хийгдсэн. Киноны зураг авалтын тавилт, гэрэл, хөгжмийн найруулга зэрэг нь олон улсын жишигт нийцсэн өндөр түвшинд хийгдсэн.
