Монголын тайз, дэлгэцийн сор эмэгтэй, Ардын жүжигчин С.Сарантуяа 1959 оны энэ өдөр Сүхбаатар аймгийн Халзан суманд 6 хүүхэдтэй айлын ууган охин болон мэндэлжээ.
Багаасаа жүжигчин болохыг мөрөөдсөн тэрбээр 16-хан настайдаа Улсын хүүхэд, залуучуудын театрын “Кепальчиш хүү” жүжигт тоглож уран бүтээлийн гараагаа эхэлсэн түүхтэй. Ингээд 1976-1980 онд Улсын багшийн дээд сургуулийн кино драмын ангид суралцаж, Х.Хайнзан, Б.Мөнхдорж нарын удирдлагад төгссөн байна. Сургуулиа төгсөж, мэргэжлийн жүжигчин болоод Э.Оюуны “Ширүүн тулааны өмнө” жүжгийн Бурмаагийн дүрээр УДЭТ-ын тайзнаа анх гарсан түүний театрт бүтээсэн дүр нь хэдийнэ 100-г давжээ. “Эмч нар” жүжгийн Бүрнээ, “Байцаагч түшмэл”-ийн Мария Антоновна, “Ээдрээ” жүжгийн Жавзан, “Хар санаа, хайр сэтгэл”-ийн Мильфорд, “Саран хөхөө”-гийн Мадимахани, “Аянгын бороо”-гийн Ши пин, “Оролмаа эх”-ийн Оролмаа, “Адууны түүх”-ийн Хулангоо гээд дурдвал олон. Хамгийн сүүлд тэрбээр Лев Толстойн “Анна Каренина” жүжгийн Вронская хатагтайн дүрээр үзэгчидтэй “уулзсан”.
Тэрбээр 1999 онд Драмын мэргэжлийн жүжигчдийн төвийг байгуулж, 2003 оноос “Гэгээн Муза” наадмыг зохион байгуулж буй. 40 гаруй жилийн турш тайз, дэлгэцэнд дүрээ мөнхөлж, үзэгчдийг уярааж, уйлуулж, инээлгэж, аргадаж, ухааруулсан энэ хатагтай “Гэгээн Муза” олон улсын театрын наадмын 4 удаагийн шагналт, оны шилдэг уран бүтээл, уран бүтээлчид гардуулдаг “Мөнгөн мод” цомын эзэн уран бүтээлч билээ.
