Монголын орчин үеийн дүрслэх урлагийн түүчээлэгч, нэрт уран бүтээлч Ж.Мөнхцэцэг “Зээр юу зүүдэлсэн бэ” бие даасан үзэсгэлэнгээ “Хаан” галерейд нээлээ.
Энэхүү үзэсгэлэн нь зээр хэмээх амьтны дүрийг уран бүтээлийн гол илэрхийлэл болгон сонгож, түүгээр дамжуулан тал нутгийн оюун санааны ертөнц, хүн ба байгалийн эмзэг харилцааг хөндсөнөөрөө онцлогтой. Уран бүтээлч хориод жилийн турш тууштай судалж, хөгжүүлсэн энэхүү сэдвээ 2025 онд Сүхбаатар аймгийн “Жаахан Шарга” театрын тайзнаа орчин үеийн бүжгийн төсөл хэлбэрээр толилуулсан бөгөөд уг төслийн санаачлагч, ерөнхий арт директороор ажилласан юм.
Хүн болон хүний бус амьд биетийн харилцан холбоо, алдагдал, хувирлын тухай эргэцүүлэх боломжийг зураг, коллаж, баримал, судалгаанд суурилсан бүтээлүүдээр үзүүлж буй “Зээр юу зүүдэлсэн бэ” үзэсгэлэн долдугаар сарын 15-ныг хүртэл үргэлжилнэ.
