Нийслэл Улаанбаатар хотын иргэдийн өдөр, “Хүрээ цам–Даншиг наадам 2026” арга хэмжээний хүрээнд нийслэлийн дүүргүүдийн шилдэг өвлөн уламжлагчдын оролцох “Ардын язгуур урлагийн тоглолт” зургаадугаар сарын 28-ны өдрийн 17:00–18:30 цагт Төв талбайд иргэд, жуулчдад зориулан үнэ төлбөргүй зохион байгуулагдана.
Энэхүү тоглолт нь Монгол Улсын нийслэл Улаанбаатар хотын түүх, соёлын өвийг сурталчлан таниулахын зэрэгцээ гадаадын жуулчдад монголчуудын уламжлалт урлаг, зан заншил, нүүдлийн соёл иргэншлийн онцлогийг нэгэн дороос үзэж сонирхох боломжийг олгоно.
Тоглолтод нийслэлийн 9 дүүргийн шилдэг өвлөн уламжлагчид оролцож, ЮНЕСКО-гийн Хүн төрөлхтний соёлын биет бус өвийн төлөөллийн жагсаалтад бүртгэгдсэн болон үндэсний хэмжээнд үнэт өвд тооцогддог ардын язгуур урлагийн төрөл зүйлсийг толилуулна. Үүнд: дэлхийд танигдсан монгол уртын дууны уянгат аялгуу, байгаль дэлхий, хүний сэтгэлийн гүн утгыг илэрхийлсэн хөөмийн гайхамшигт эгшиг, үндэсний бүжгийн өв болох бий биелгээний уран нарийн хөдөлгөөн, тууль хайлах урлагийн өвөрмөц өгүүлэмж, лимбэний битүү амьсгааны хосгүй ур чадвар, морин хуур, икэл хуур зэрэг уламжлалт хөгжмийн зэмсгийн аялгуу эгшиглэх юм.
Мөн Монгол орны олон ястан, угсаатны өв соёл, зан заншил, амьдралын хэв маягийг илэрхийлсэн үзүүлбэрүүдийг нэгэн тайзнаа цогцоор нь толилуулж, нүүдэлчдийн оюуны болон урлагийн өвийн өвөрмөц өнгө төрх, үнэт өв санг олон улсын зочид, жуулчдад хүргэнэ.
Төв талбайд болох энэхүү тоглолтоор дамжуулан дотоод, гадаадын зочид Монголын ардын язгуур урлагийн дахин давтагдашгүй өв соёлтой танилцаж, үндэсний өв уламжлалын үнэ цэнэ, уран сайхны онцлогийг бодитоор мэдрэхийн зэрэгцээ Улаанбаатар хотын соёлын амьдралын нэгэн онцлох үйл явдлын гэрч болох боломжтой юм.
