Тулгар төрийн 2235, Их Монгол Улсын 820, Үндэсний эрх чөлөө, тусгаар тогтнолоо сэргээн мандуулсны 115, Ардын хувьсгалын 105, Ардчилсан хувьсгалын 36 жилийн ойн Үндэсний их баяр наадамд зориулан Богд Хааны ордон музейд “Бат оршил” тусгай үзэсгэлэнг энэ сарын 10-нд нээнэ.
1639 онд Өндөр гэгээн Занабазарыг Богд Жавзандамба хутагтын ширээнд өргөмжлөн залах үеэс эхтэй Даншиг наадам нь Халх Жавзандамбын Их Хүрээний гол баяр юм.
Үзэсгэлэнд VIII Богд хааны ханьцаж тэнцэшгүй эрхийг бэлгэдэн үзүүлсэн хүрэм жанч хантааз, гадагш морилоход хааны хэрэглэх жууз ба зөөврийн түшлэг сэнтий, “Бат оршил” хэмээх Даншгийн үеэр Богдын насан хутаг өлмий батдахын хэрэг учирт мандал өргөхөд хэрэглэдэг лагшин зарлиг тааллын шүтээн, мандал, хаан төрийн долоон эрдэнэ мэт эд хэрэглэл, Даншгийн болон Долоон хошуу наадмын зураг зэрэг нийт 40 гаруй үзмэрийг дэлгэх юм.
Тус үзэсгэлэн Богд Хааны ордон музейн үзэсгэлэнгийн танхимд энэ сарын 20-ныг хүртэл наадамчин олонд нээлттэй байх юм.
