Олон улсын хөлбөмбөгийн холбоо (FIFA) Америкийн влоггер IShowSpeed-ийг арьс өнгөөр ялгаварлан гадуурхсан гэх хэргийг албан ёсоор мөрдөн шалгаж эхэллээ.
Уг хэрэг долдугаар сарын 3-ны баасан гарагт Майами хотын “Hard Rock” цэнгэлдэх хүрээлэнд болсон Аргентин, Кабо-Вердегийн тоглолтын үеэр гарсан байна. Тэмцээний үеэр Кабо-Вердегийн өмсгөл өмссөн IShowSpeed Аргентины хөгжөөн дэмжигчтэй маргаж буй бичлэг түүний YouTube сувагт нийтлэгдсэн юм.
FIFA-гаас гаргасан мэдэгдэлд “Дэлхийн аварга шалгаруулах тэмцээн бол эв нэгдэл, олон талт байдал, харилцан хүндэтгэлийн баяр юм. Эдгээр үнэт зүйлсийг үгүйсгэсэн үйлдэл гаргасан хэн бүхэнд хөлбөмбөгийн ертөнцөд орон зай байхгүй” хэмээн онцолсон байна.
Нийгмийн сүлжээнд 100 гаруй сая дагагчтай IShowSpeed (жинхэнэ нэр Даррен Жейсон Уоткинс Жуниор) ДАШТ-ий үеэр шууд дамжуулалт хийж байгаа юм. Түүний бичлэгт FIFA-гийн ерөнхийлөгч Жанни Инфантино, хөлбөмбөгчин Златан Ибрагимович нар ч оролцоод амжжээ.
Энэхүү үйл явдлаас хэдхэн хоногийн өмнө Францын шигшээ багийн довтлогч Килиан Мбаппег арьс өнгөөр ялгаварлан гадуурхсан хэрэг гарсан юм.
