Тулгар төрийн 2235, Их Монгол Улс байгуулагдсаны 820, Үндэсний эрх чөлөө, тусгаар тогтнолоо сэргээн мандуулсны 115, Ардын хувьсгалын 105 жилийн ой, Ардчилсан хувьсгалын 36 жилийн ой, Үндэсний их баяр наадмын хүрээнд зохион байгуулдаг “Монголын сайхан орон-2026” уран бүтээлийн үзэсгэлэнг нээлээ.
Тус дүрслэх урлагийн үзэсгэлэн МУЭ-ийн арт галерейд долдугаар сарын 20-ны өдрийг дуустал үргэлжлэх юм.
“Монголын сайхан орон-2026” үзэсгэлэнд нийт 116 уран бүтээлчийн 120 шилдэг бүтээлийг олон нийтэд толилуулж байна. Энэ жилийн хувьд Монголын дүрслэх урлагийн салбарт өөрсдийн жинтэй байр суурийг эзэлсэн нэрт уран бүтээлчдийг урилгаар оролцуулж, үзэсгэлэнгийн чанар, цар хүрээг дээшлүүлснээрээ нэн онцлогтой үйл явдал болж байна.
Монгол Улсын Соёл, спорт, аялал жуулчлал, залуучуудын яамны дэмжлэгтэйгээр зохион байгуулагдаж буй тус үзэсгэлэн нь наадамчин олон болон Үндэсний их баяр наадмыг үзэж сонирхохоор ирсэн гадаадын жуулчдад Монголын дүрслэх урлагийн өв уламжлал, өнөөгийн чиг хандлага, үндэсний хэв маяг, Монгол зураачдын ур чадварыг сурталчлан таниулах зорилготой юм.
