“Agent Kim Reactivated” цуврал кино “Netflix”-ийн англи бус хэлээрх контентын долоо хоногийн жагсаалтыг тэргүүлж, уг чансааг дөрвөн долоо хоног дараалан тэргүүлж байсан “Teach You a Lesson” цувралыг ардаа орхисон тухай стриминг платформ лхагва гараг /2026.07.08/-т мэдээлжээ.
Тус цувралд жүжигчин Со Жи Соб жирийн нэгэн аавын дүрийг бүтээдэг бөгөөд гэнэт сураггүй алга болсон охиноо хайж эхэлснээр өнгөрсөн үеийн нууцаа дэлгэхээс өөр аргагүйд хүрдэг. “Netflix”-ийн мэдээлснээр, уг цувралыг өнгөрсөн долоо хоногт 10.5 сая удаа үзсэн байна.
Вэбтүүнээс сэдэвлэн бүтээсэн уг цуврал зургаадугаар сарын 26-нд нээлтээ хийсний дараах эхний долоо хоногтоо гуравдугаарт бичигдэж байсан бол энэ удаа Өмнөд Солонгос, Индонез, Боливи зэрэг 11 улсад энэ ангилалдаа хамгийн олон үзэгчтэй цувралаар шалгарч, 68 улсад эхний аравт багтсан байна.
Сүүлийн дөрвөн долоо хоногийн турш жагсаалтыг тэргүүлж байсан сургуулийн амьдралын тухай “Teach You a Lesson” цуврал 4.7 сая үзэлттэйгээр хоёрдугаарт бичигджээ. Тус цуврал мөн 54 оронд шилдэг 10-т багтсан хэвээр байна.
Англи бус хэлээрх киноны ангилалд Солонгосын адал явдалт, инээдмийн “Husbands in Action” кино 1.7 сая үзэлттэйгээр хоёрдугаар байрт жагссаж, өмнөх долоо хоногоос нэг байраар ухарчээ.
Англи хэлээрх киноны төрөлд “KPop Demon Hunters” кино 55 дахь долоо хоногтоо дараалан шилдэг 10-т багтаж, 3.5 сая үзэлттэйгээр зургаадугаарт бичигдсэн байна.
