Хөвсгөл аймгийн Төв музей аялагч иргэдэд зориулан цагийн хуваарьт өөрчлөлт оруулан өдөр бүр ажиллаж эхэллээ.
Хоймор нутгийг зорин ирж буй гадаад, дотоодын аялагч нарт зориулан өдөр бүр 8-17 цаг хүртэл ажиллаж байгаа тул Хөвсгөл нутгийн түүх, соёлын өвтэй танилцах боломжтой юм.
Төв музей 1949 онд байгуулагдсан. Чулуун зэвсгийн үеэс эхлэн XX зууны сүүл үе хүртэлх аймгийн түүх, угсаатны зүй, байгалийн холбогдолтой үзмэрийг үзүүллэгийн 3 танхимд дэлгэн үзүүлж байна.
Өнөөдөр тус музей Хөвсгөл аймгийн Түүх, угсаатны зүй, шашин, археологи, урлаг, уран сайхан, байгалийн ач холбогдол бүхий 4000 орчим үзмэртэй.
Нийт цуглуулгын 40 орчим хувийг байнгын үзүүллэгийн 3 танхимд дэглэсэн соёлын үйлчилгээг олон нийтэд хүргэдэг бөгөөд мэргэжлийн судалгааны байгууллагатай хамтран ном бүтээл гаргах, судалгаа хийх, музейн боловсролын хөтөлбөрийг хэрэгжүүлж түр болон нүүдлийн үзэсгэлэнгээр тогтмол үйлчилдэг.
Орон нутгийнхаа байгаль, түүх, соёл, угсаатны зүйн Шинжлэх ухааны ач холбогдол бүхий үнэт зүйлсийг цуглуулан сан хөмрөгөө тогтмол баяжуулж ирсэн бөгөөд нийт цуглуулгын 60 орчим хувь сан хөмрөгт хадгалагдаж байдаг тул байнгын үзүүллэгийн танхимд төлөвлөгөөний дагуу жилд 2-3 удаа шинээр үзмэр гаргаж дэглэн үзэгчдэд музейг олон удаа давтамжтай үзэх боломжийг ханган ажиллаж байна.
