Хөвсгөл аймгийн Хөгжимт драмын театр байгуулагдсаны түүхт 50 жилийн ойн баяр боллоо. Тус баярт аймгийн Засаг дарга Л.Төмөрбаатар мэндчилгээ дэвшүүлж, Хөгжимт драмын театр нь 50 жилийн хугацаанд соёл, урлагийн хөгжлийг манлайлан, үндэсний өв соёлыг хадгалан хамгаалах, түгээн дэлгэрүүлэх үйлсэд үнэтэй хувь нэмэр оруулж ирснийг онцлон тэмдэглэлээ.
Театрын түүхт 50 жилийн ойн арга хэмжээг дэмжин 150 сая төгрөгийн санхүүжилт шийдвэрлэсэн бөгөөд цаашид соёл, урлагийн салбарын хөгжил, хүний нөөц, уран бүтээлчдийн ажиллах орчин, нөхцөлийг сайжруулах, Хөгжимт драмын театрын шинэ барилгын төслийг бодлогын түвшинд дэмжин ажиллахаа илэрхийлж театрын хөгжилд үнэтэй хувь нэмэр оруулсан үе үеийн удирдлага, ахмад зүтгэлтэн, уран бүтээлчдэд хүндэтгэл үзүүллээ.
Хөвсгөл аймгийн Хөгжимт драмын театр нь өнгөрсөн 50 жилийн хугацаанд 420 гаруй жүжиг, дуурь, 60 гаруй хүүхдийн жүжиг, 3500 гаруй тоглолт, хүндэтгэлийн концерт үзэгчдийн хүртээл болгож, үндэсний болон олон улсын түвшинд Хөвсгөл аймгийн соёл, урлагийг сурталчлан ажиллаж байна.
Түүхий хуудсыг сөхвөл, Ардын Засгийн газар хөдөө орон нутагт уран сайхныг хөгжүүлэх нь олон түмнийг гэгээрүүлэхэд улаан гэр, клубийг байгуулахыг чухалчилж байлаа.
1933 онд хуралдан аймгийн намын баг хурлаас аймгийн клуб байгуулах шийдвэр гаргасан нь Хөгжимт драмын театрын эх үүсвэр болсон байна. 1937 оны долдугаар сарын 1-нд аймгийн клуб өөрийн гэсэн байртай болж есөн хүний орон тоотой ажиллаж эхэлсэн түүхтэй юм. 1951 онд анх удаа “Эрдэнийн Дорж” гэдэг жүжиг тоглож байжээ.
