Монгол Улсын Ерөнхийлөгч У.Хүрэлсүхийн санаачилгаар анх удаа зохион байгуулагдаж буй “Дэлхийн адууны өдөр”-ийг тохиолдуулан Монголын уран зургийн галерей Хүй долоон худагт тусгай үзэсгэлэн гаргаж, наадамчин олонд үйлчиллээ.
Монголчуудын ахуй соёл, түүх, уламжлалын салшгүй хэсэг болсон эрдэнэт хүлэг морио алдаршуулах, түүгээр дамжуулан үндэсний өв соёлыг түгээн дэлгэрүүлэх зорилготой тус үзэсгэлэнд адууны сэдэвт уран бүтээлүүдийг дэлгэн үзүүлсэн юм.
Үзэсгэлэнгийн үеэр хүүхэд залуучууд болон наадамчин олонд зориулсан соёл, боловсролын тусгай хөтөлбөрүүдийг хэрэгжүүллээ. Үүний хүрээнд монгол уран бичлэгийн сургалт, мастер класс зохион байгуулж, хүрэлцэн ирсэн зочдод үндэсний бичиг соёлоороо дамжуулан адууны соёлыг сурталчлах сонирхолтой арга хэмжээнүүдийг заан явуулав.
