ОХУ-ын Санкт-Петербург хотноо зохион байгуулагддаг Елена Образцовагийн нэрэмжит XVI олон улсын дуурийн дуулаачдын уралдаанд залуу дуучин Т.Санжаа амжилттай оролцож, финалист болжээ. Мөн тэрбээр Эрхүү хотын Филармонийн нэрэмжит тусгай шагнал хүртсэн байна.
Энэхүү уралдаан нь дэлхийн олон орны шилдэг залуу дуурийн дуулаачид ур чадвараа сорьдог, өндөр түвшний, нэр хүндтэй тайз юм.
Дуучин Т.Санжаа энэ талаараа “Ийм хэмжээний уралдааны финалд шалгарч, мэргэжлийн шүүгчид болон сонгодог урлагийн төлөөлөгчдөөс үнэлгээ авсан нь миний хувьд асар их урам зориг, цаашид улам их хичээх хариуцлагыг өглөө. Энэ хугацаанд надад итгэж, үргэлж дэмжиж, урам зориг хайрласан гэр бүл, багш нар, найз нөхөд, Сүлд чуулгын хамт олон, Цагдаагийн ерөнхий газрын нийт бие бүрэлдэхүүн, мөн үргэлж сонсож, дэмждэг та бүхэндээ чин сэтгэлийн талархал илэрхийлье. Цаашид улам их суралцаж, ур чадвараа хөгжүүлэн, өөрийгөө тасралтгүй дайчлан ажиллах болно. Мөн Монголынхоо нэрийг олон улсын тайзнаа өндөрт өргөхийн төлөө хичээн зүтгэх болно” хэмээн сэтгэгдлээ хуваалцжээ.
