Реппер, продюсер Jay-Z Нью-Йорк хотын Y”ankee Stadium”-д зохион байгуулсан гурван үдшийн тоглолтынхоо төгсгөлийн “Extra Innings” шоуг гурван цаг гаруй саатсаны дараа эхлүүлсэн ч үзэгчдэд мартагдашгүй үдшийг бэлэглэлээ. Саатал нь цэнгэлдэхийн гадна тасалбаргүй олон хүн цугларч, аюулгүй байдлын асуудал үүссэнтэй холбоотой байв.
Тайзан дээр гармагцаа Jay-Z үзэгчдээс уучлал хүсээд “Гадна байгаа бүх хүний аюулгүй байдлыг хангах нь бидний нэн тэргүүний зорилт байсан” хэмээн тайлбарласан байна.
Шоуны хамгийн том сюрпризуудын нэг нь Рианнагийн тайзнаа эргэн ирсэн явдал байлаа. Тэрбээр Jay-Z-тэй хамт “Run This Town” дуугаа дуулж, дараа нь өөрийн хит бүтээл “Bitch Better Have My Money”-г толилуулсан нь үзэгчдийг хамгийн их догдлуулсан мөчүүдийн нэг болсон юм. Энэ нь Рианнагийн сүүлийн хоёр жилийн хугацаанд хийсэн анхны тайзны тоглолтуудын нэг байлаа.
Мөн тоглолтод Бейонсе, Ашер, Фаррелл Уильямс, The-Dream, Clipse, Jeezy, Fat Jo, Swizz Beatz зэрэг олон алдартай уран бүтээлчид гэнэтийн зочноор оролцож, Jay-Z-гийн 30 жилийн хөгжмийн замналыг хамтдаа тэмдэглэв.
Энэхүү тоглолт нь Jay-Z-гийн 30 жилийн уран бүтээлийн ойд зориулсан цуврал шоуны сүүлчийн тоглолт байсан бөгөөд шөнө дунд эхэлсэн ч хэдэн арван мянган үзэгч тоглолтыг дуустал үзэж, рэп хөгжмийн түүхэн үдшийн гэрч болсон байна.
