Өмнөд Солонгос, АНУ-ын судлаачид гараа ашиглахгүйгээр автоматаар хувцасладаг робот бүтээжээ. Уг технологийг өндөр настан, хөгжлийн бэрхшээлтэй хүмүүст туслахын зэрэгцээ эмнэлэг, онцгой байдлын алба болон чип үйлдвэрлэлийн ариутгасан өрөөнд ашиглах боломжтой гэж үзэж байна.
Технологийг Өмнөд Солонгосын “KAIST” болон АНУ-ын Стэнфордын их сургуулийн судлаачид хамтран бүтээжээ.
Робот нь хувцсанд суурилуулсан, агаарын даралтаар ажилладаг уян хэсгүүдийн тусламжтайгаар хүнийг хувцасладаг байна. Эдгээр уян хэсэг нь мөлхөө ургамал хана даган ургадагтай адил хүний биеийн хэлбэрийг даган хөдөлж, хувцсыг дээш татдаг аж. Ингэснээр хүн хувцаслахдаа гараа ашиглах шаардлагагүй бөгөөд заавал хөдөлгөөнгүй зогсох ч хэрэггүй. Бүтэн хувцас өмсөхөд ойролцоогоор 10 секунд зарцуулагдах болно.
Судалгааны ажлын гол зохиогч Ким Нам Гюн дугуй унаж байхдаа бороо орсон үед энэ технологийг бүтээх санаа төрсөн гэж ярьжээ. Тэрбээр “Дугуй унаж байхдаа борооны цуваа автоматаар өмсөж чаддаг бол их хэрэгтэй байх байсан. Тэр үед л энэ технологийг бүтээх гэж үзье гэж бодсон” гэжээ.
Робот нь бүх биеэрээ хөдөлж байрлалаа өөрчлөхийн оронд үзүүр хэсгээрээ урагшилдаг. Ингэснээр хүний биеийн хэлбэрийг даган тогтвортой хөдөлж, нарийн зайгаар ч нэвтэрч чаддаг байна. Судалгааны үр дүнг робот техник, автоматжуулалтын чиглэлээр мэргэшсэн, хянан магадалдаг “IEEE Robotics and Automation Letters” сэтгүүлд нийтэлжээ.
