“Хү” хамтлаг Их Британи дахь “Warrior Chant” аялан тоглолтынхоо хүрээнд аравдугаар сарын 2-нд Английн Борнмут хот дахь амьд хөгжмийн тоглолтын алдартай танхим болох “O2 Academy”-гийн тайзнаа тоглоно.
Хүннү рок урсгалаараа алдаршсан тэдэнтэй Францын “Skald” хамтлаг хамтран аялан тоглох юм.
Энэхүү аялан тоглолт нь “Хү” хамтлагийн хувьд 2023 оны зун “Glastonbury” хөгжмийн наадамд оролцсоноос хойш Их Британи дахь анхны аялан тоглолт юм. Тухайн үеийн амьд тоглолтынхоо бичлэгийг 2024 онд бие даасан цомог болгон гаргаж байв. Тус хамтлагийн хамгийн сүүлийн “Hun” цомог энэ оны долоодугаар сарын 24-нд гарчээ.
“Хү” хамтлаг 2016 онд Улаанбаатар хотод байгуулагдсан. Дахин давтагдашгүй хүннү рок урсгалаараа дэлхийд танигдсан тус хамтлагийн дуунууд дэлхий даяар 900 сая орчим удаа тоглогджээ. Түүнчлэн “Glastonbury”-гийн их тайзнаа уран бүтээлээ толилуулж, Хойд Америкийн томоохон цэнгэлдэх хүрээлэнгүүдэд “Iron Maiden” хамтлагтай хамт тоглож байв. Мөн алдарт “Metallica” хамтлагийн хүсэлтээр “Through The Never” дууг нь хүннү рок урсгалаараа коверлон “The Metallica Blacklist” цомогт оруулсан билээ.
“Хү”-гийн анхны цомог бол “The Gereg” бөгөөд тус хамтлагийн дуунууд “Star Wars Jedi: Fallen Order”, “Star Wars Jedi: Survivor” хэмээх хоёр ч видео тоглоомд эгшиглэдэг.
Тэдний Их Британи дахь аялан тоглолт нь есдүгээр сарын 29-нд Глазго хотоос (O2 Academy) эхлэх бөгөөд Бристол (Prospect Building, аравдугаар сарын 1), Борнмут (O2 Academy, аравдугаар сарын 2), Ньюкасл (O2 City Hall, аравдугаар сарын 3), Белфаст (The Telegraph, аравдугаар сарын 5), Бирмингем (O2 Academy, аравдугаар сарын 8), Лондон (O2 Academy Brixton, аравдугаар сарын 9), Манчестер (O2 Apollo, аравдугаар сарын 10), хотуудад үргэлжилж, Норвич (UEA, аравдугаар сарын 11) хотод өндөрлөнө.
