Монгол Улсын төр, нийгмийн нэрт зүтгэлтэн, Монгол Улсын Ерөнхий сайд асан Жамбын Батмөнхийн мэндэлсний 100 жилийн ой энэ онд тохиож байна.
Тус ойн хүрээнд түүний түүхэн гавьяа зүтгэл, ажил үйлс, амжилт бүтээл, түүх намтарыг хүүхэд, залуучуудад сурталчлан таниулах, эх оронч үзэл, үндэсний бахархлыг төлөвшүүлэх зорилгоор олон ажлыг санаачлан хийж хэрэгжүүлсээр байгаа юм.
Үүний нэг нь Ерөнхий боловсролын сургуулийн ахлах, дунд ангийн сурагчдын дунд “Жамбын Батмөнхийн намтар, үйл ажиллагаа”, их, дээд сургуулийн оюутнуудын дунд “Жамбын Батмөнхийн Монголын ардчилсан хувьсгалд оруулсан хувь нэмэр”, насанд хүрэгчдийн дунд “Жамбын Батмөнхийн Монголын түүхэнд гүйцэтгэсэн үүрэг” сэдвээр эсээ бичлэгийн уралдаан зарлажээ.
Эсээ нь 1000-аас илүүгүй үгтэй, зөв бичих дүрэм болон найруулгын алдаагүй, бусдын бүтээлийг хуулбарлаагүй эх бүтээл байх юм. Мөн ашигласан эх сурвалжаа зохих журмын дагуу эш татаж, овог нэр, сургууль, анги, байгууллага, албан тушаал, баг, хороо, холбоо барих утасны дугаараа тодорхой бичих юм байна.
Нийтдээ 3 сая төгрөгийн шагналын сантай тус уралдааны бүтээлийг ирэх наймдугаар сарын 6-ны өдрийн 17:00 цаг хүртэл Увс аймгийн Боловсролын газарт хүлээн авна.
Ж.Батмөнхийн мэндэлсний түүхт 100 жилийн ойн хүрээнд “Түүх мартахгүй” гэрэл зургийн үзэсгэлэн, эрдэм шинжилгээний хурал зэрэг ажлыг зохион байгуулаад байна.
