Ховд аймгийн Мянгад сумын Баянбулаг багийн нутаг, Шаврын үүдний улаан тохой гэх газарт нэгэн хүн чулуун хөшөө бий.
Далайн түвшнээс 1750 метрийн өндөрт, Баянбулаг багийн төвөөс хойш 20 гаруй км-т орших энэхүү дурсгалыг нутгийн иргэд Шаврын үүдний улаан тохойн хүн чулуун хөшөө хэмээн нэрлэдэг.
Уг хүн чулуун хөшөө нь 157 см өндөр, 44 см өргөн, 22 см зузаан хэмжээтэй. Хөшөөнд хүний эрүү, нүүр, нүд, хамар, амыг тодорхой дүрсэлжээ. Мөн баруун гартаа хундага хэлбэрийн сав барьсан, зүүн гарыг бүсэндээ зүүсэн чичлүүр хутганы орчимд байршуулан урлажээ.
Уг хүн чулуун хөшөө нь хийц, дүрслэлийн онцлогоороо Түрэгийн үе (МЭ VI–VIII зуун)-д холбогдох ба Ховд аймгийн түүх, соёлын өвийг баяжуулсан үнэт дурсгалын нэг юм.
Мянгад сум нь Улаанбаатар хотоос 1500 орчим км, Ховд аймгаас 50 орчим км зайд оршдог.
