“ТикТок” платформд хорт хавдартай тэмцэж буй амьдралаа илэн далангүй хуваалцсанаараа олон сая хүний танил болсон Сидней Тоул 26 насандаа таалал төгсжээ. Түүний гэр бүл энэ тухай наймдугаар сарын 6-нд олон нийтэд мэдэгдсэн байна.
Тоул 23 настайдаа цөсний сувгийн ховор төрлийн хорт хавдар болох холангиокарцинома (cholangiocarcinoma)-тай гэж оношлогдсон юм. Анх хэвлийн хэсэгт овойлт, хорсох мэдрэмж илэрсний дараа эмчид үзүүлэхэд шинжилгээгээр хавдар илэрсэн байна.
Оношоо сонссоныхоо дараа тэрээр эмчилгээ, мэс засал, хими эмчилгээ, эмнэлгийн өдөр тутмын амьдрал, сэтгэл санааны тэмцлээ “ТикТок” болон инстаграм хуудсаараа дамжуулан хуваалцаж эхэлсэн. Түүний чин сэтгэлийн бичлэгүүд олон хүнд урам зориг өгч, “ТикТок” дээр 1.1 сая гаруй дагагчтай болжээ.
Сидней зөвхөн өвчнийхөө талаар бус аялал, найз нөхөдтэйгөө өнгөрүүлсэн мөчүүд, загварын контент зэрэг энгийн амьдралаа ч нийтэлдэг байсан бөгөөд “хорт хавдартай хүн ямар харагддаг вэ” гэсэн хэвшмэл ойлголтыг өөрчлөхийг зорьдог байжээ. Тэрээр мөн хорт хавдартай залуу хүмүүст ойлголцол, дэмжлэг бий болгохын төлөө дуу хоолойгоо өргөж байсан юм.
Сүүлийн саруудад түүний биеийн байдал эрс муудаж, эмчилгээ үргэлжлүүлэх боломж хумигдсан тул хосписийн тусламжид шилжсэн байжээ. Гэр бүлийнхэн нь түүнийг хайртай хүмүүсийнхээ дунд тайван нойрссон хэмээн мэдээлсэн байна.
Түүний гэр бүл инстаграм хуудсаар дамжуулан “Сидней, бид чамайг үргэлж хайрлах болно. Чи ямар их зоригтой тэмцсэнийг чинь бид үргэлж бахархах болно. Би чамд хайртай” хэмээн сэтгэл эмзэглүүлсэн бичвэр нийтэлжээ. Энэхүү мэдээний дараа олон мянган дагагч, найз нөхөд, хамтран ажиллагчид нь түүнийг дурсан хүндэтгэл илэрхийлсэн байна.
