Дундговь аймгийн Өлзийт сумын нутагт, Мандалговь хотоос баруун урагш 156 км-т орших Цагаан суварга нь 60 орчим метр өндөр, 400 метр үргэлжилсэн эгц мөргөцөг бүхий байгалийн дурсгалт газар юм.
Эрт цагт далайн ёроолын шаварлаг хурдас салхи, усны нөлөөгөөр элэгдэж, эвдэрснээр бий болсон мөргөцгийн зарим хэсэг 90 хэмийн эгц бөгөөд зүүн талаас цайран харагддаг. Эгц цавчим мөргөцөг нь алсаас суварга мэт үзэгддэг тул Цагаан суварга хэмээн нэрлэжээ.
Зүүн талаас байшин, хот балгас мэт дүр төрх ажиглагддаг бол урд талаас тэгш тал үргэлжилж байгаад огцом хавцал болон тогтсон онцлогтой.
Цагаан суварга нь байгалийн гайхамшигт дүр төрхөөрөө дотоод, гадаадын аялагчдын сонирхлыг татдаг. Өлзийт сумын нутагт үүнээс гадна Өөш манхан, Хэвтээ босоогийн агуй, Морин толгойн цав зэрэг үзэсгэлэнт газрууд бий.
Аялагчдад зориулсан нөхцлийг бүрдүүлэх хүрээнд Цагаан суваргын орчимд автомашины зогсоол, майхан барих талбай, явган зам, гэрэлтүүлэг, ариун цэврийн байгууламж, мэдээллийн самбар бүхий отоглох цэг байгуулжээ.
Цагаан суварга нь Дэл, Хөнжилийн уулын хамт тусгай хамгаалалттай газар нутагт багтдаг бөгөөд орчны цэвэр цэмцгэр байдлыг хангах, байгалийн унаган төрхийг хадгалахад анхаарч ажиллахыг Дундговь аймгийн Байгаль орчны газрын мэргэжилтэн Т.Эрдэнэзаяа хэлэв.
Гэрэл зураг: Э.Мөнхчулуун
