“Оскар”-ын шагналт жүжигчин Мэрил Стрип “The Devil Wears Prada 2” кинонд өмссөн хувцас, гоёлын эд зүйлсээ дуудлага худалдаагаар худалдахаар “Christie’s” дуудлага худалдааны ордонтой хамтран ажиллаж байна.
Энэхүү онлайн дуудлага худалдаа есдүгээр сарын 1–15-ны хооронд зохион байгуулагдах бөгөөд кинонд гардаг хувцас, гоёл чимэглэл болон бусад загварын эд зүйлсийг багтаах ажээ.
Дуудлага худалдаанд киноны гол дүрүүдийн өмссөн нийт 20 багц хувцас, аксессуар багтах бөгөөд үүнд Мэрил Стрипийн бүтээсэн Миранда Пристли, Энн Хэтэуэйн бүтээсэн Энди Сакс, Эмили Блантын бүтээсэн Эмили Чарлтон зэрэг дүрүүдийн хувцаснууд багтжээ. Мөн Лэди Гага, Симон Эшли зэрэг уран бүтээлчдийн кинонд өмссөн хувцаснууд худалдаалагдана.
Тухайлбал, Энн Хэтэуэйн кинонд өмссөн “Gabriela Hearst” брэндийн даашинз, Мэрил Стрипийн дүрийн хувцаснуудаас “Dries Van Noten” брэндийн гоёлын хүрэм болон “Schiaparelli”-ийн хувцас, мөн Эмили Блантын зүүсэн “Tiffany & Co. Elsa Peretti Bone Cuff” бугуйвч, “Valentino” брэндийн гутал болон бусад ховор эд зүйлсийг худалдаална.
Энэхүү дуудлага худалдааг Мэрил Стрип өөрөө санаачилсан бөгөөд цугласан орлогыг Сэтгүүлчдийг хамгаалах хороо (Committee to Protect Journalists) болон Америкийн загвар зохион бүтээгчдийн зөвлөл (Council of Fashion Designers of America)-д хандивлах юм.
Мөн дуудлага худалдаанд орох эд зүйлсийг Нью-Йорк дахь “Christie’s”-ийн “Rockefeller Plaza” салбарт есдүгээр сарын 8–13-нд олон нийтэд үнэ төлбөргүй дэлгэн үзүүлэхээр төлөвлөжээ.
