Өмнөд Солонгосын нэрт жүжигчин Жо Ин Соны тоглосон бүтээлүүд дэлхийн хамгийн нэр хүндтэй кино наадмуудад өрсөлдсөөр байна. Тодруулбал, өнгөрсөн тавдугаар сард түүний тоглосон “Hope” кино Каннын олон улсын кино наадмын үндсэн уралдаант хэсэгт шалгарч, хамгийн нэр хүндтэй шагнал болох “Алтан далдуу мод”-ны төлөө өрсөлдсөн юм.
Тэгвэл тэрбээр тун удахгүй нээлтээ хийх найруулагч И Чан Дуны “Possible Love” бүтээлээрээ ирэх есдүгээр сард болох Венецийн 83 дахь удаагийн олон улсын кино наадмын үндсэн уралдаант хэсэгт багтаж, “Алтан арслан” шагналын төлөө өрсөлдөхөөр албан ёсоор сонгогджээ.
164 минут үргэлжлэх “Possible Love” кинонд амьдралынх нь нөхцөл байдал өөр хоёр гэр бүлийн тухай өгүүлнэ. Ажлаасаа халагдсан эр болон түүний эхнэр, баримтат кино бүтээгч болон түүний нөхөр гэсэн хоёр хосын зам огтлолцсоноор тэдний амьдралын ялгаа, нуугдмал хүсэл тэмүүлэл ил гарч эхэлдэг байна.
“Possible Love” киног Венецийн наадмын дараа Торонтогийн олон улсын кино наадамд тусгай хөтөлбөрөөр гаргахаар төлөвлөсөн бөгөөд Өмнөд Солонгосын кинотеатруудад есдүгээр сарын 23-нд нээлтээ хийж, харин дэлхий даяарх үзэгчдэд арваннэгдүгээр сарын 6-наас “Netflix”-ээр хүргэхээр товложээ.
