Монгол Улсын хүүхэлдэйн театрын уран бүтээлчид Чунчоны олон улсын хүүхэлдэйн фестивальд оролцохоор хүлгийн жолоо залах гэж байна.
Тус фестивалийн тайзнаа найруулагч Б.Анхбаатарын бүтээл, Монгол Улсын Хүүхэлдэйн театрын 2025 оны онцлох уран бүтээл болох “Одиссей” пластик хүүхэлдэйн жүжгийг олон улсын үзэгчдэд толилуулах аж. Мөн “Одиссей” жүжгийг олон улсын фестивалийн тайзнаа хүргэхийн өмнө Монгол Улсын хүүхэлдэйн театрын тайзнаа цөөн удаа тоглохоор болжээ.
Эртний Грекийн домгийн баатар Одиссейн адал явдлыг харуулсан энэхүү пластик хүүхэлдэйн жүжиг нь хөдөлгөөн, дүрслэл, хөгжим, гэрлийн уран зохицлоор өгүүлэмжээ бүрдүүлдэг. Троя хотын дайнаас нутагтаа хүрэхээр арван жил тэнүүчилсэн Одиссейн замд учрах сорил, мангас, бурхан тэнгэрүүдийн ертөнц үзэгчдийг үлгэрийн гайхамшигт орон зайд хөтөлнө. Үггүй жүжгийн хэлбэр нь хүүхэлдэйн урлагийн шинэ боломжийг нээж, сонгодог туульсыг орчин үеийн өнгө төрхөөр дахин амилуулж байна. Эртний домгийн гүн утга, орчин цагийн тайзны урлагийн нийлэмж нь үзэгчдийн төсөөллийг шинэ түвшинд хүргэнэ.
