Холливудын жүжигчин Эва Лонгориа өөрийн хүү Сантьягод алдарт “Desperate Housewives” буюу “Яахаас буцахгүй эзэгтэй нар” цувралыг үзэхийг хоригложээ.
“Desperate Housewives” цувралын Габриэль Солисын дүрээр дэлхий даяар танигдсан Эва Лонгориагийн найман настай хүү Сантьяго нь YouTube болон цахим орчинд ээжтэй нь холбоотой бичлэг, хэсгүүдийг үзсэний дараа “Desperate Housewives” цувралыг бүтнээр нь үзэх хүсэлтэй болсон байна. Гэвч Лонгориа хүүгээ уг цувралыг үзэхэд хараахан тохиромжтой насанд хүрээгүй гэж үзэж байгаа аж.
Эва Лонгориа 2004-2012 оны хооронд дэлгэцнээ гарсан “Desperate Housewives” цувралд тоглосон бөгөөд жүжигчнээс гадна продюсер, найруулагч, нийгмийн идэвхтэн гэдгээрээ танигдсан нэгэн юм. Тэрбээр Холливудад 20 гаруй жил ажиллах хугацаандаа дэлгэцийн өмнө болон ард олон төсөл дээр ажиллаж, өөрийн байгуулсан продакшнаар дамжуулан төлөөлөл багатай бүлгүүдийн түүхийг өгүүлэх бүтээлүүдийг дэмжиж иржээ.
