Өмнөд Солонгосын алдарт “Stray Kids” хамтлагийн гишүүн Ли Ноу Непалд болсон үерийн гамшигт нэрвэгдсэн иргэдэд туслахаар 100 сая вон буюу ойролцоогоор 72 мянган ам.доллар хандивлажээ.
Түүний харьяалагддаг “JYP Entertainment” агентлагийн мэдээлснээр Ли Ноу наймдугаар сарын 28-нд олон улсын хүмүүнлэгийн байгууллага болох “World Vision”-оор дамжуулан хандив өргөсөн байна.
Хандивын мөнгийг Непалын үерийн гамшигт өртсөн хүүхэд болон гэр бүлүүдэд яаралтай тусламж үзүүлэхэд зарцуулахаар төлөвлөжээ. Тодруулбал, хүнс, шим тэжээлийн тусламж, түр байр, цэвэр ус болон ариун цэврийн хэрэгцээг хангах чиглэлээр ашиглах аж.
Ли Ноу энэхүү хандив нь байгалийн гамшгийн улмаас хүнд нөхцөл байдалд орсон хүмүүст бага ч гэсэн дэмжлэг, итгэл найдвар болно гэдэгт найдаж байгаагаа илэрхийлсэн байна.
“Stray Kids”-ийн гишүүн Ли Ноу өмнө нь ч нийгмийн сайн сайхны төлөөх үйл ажиллагаанд идэвхтэй оролцож, төрөл бүрийн хүмүүнлэгийн ажилд хувь нэмрээ оруулж байсан билээ.
