Их Британийн Баруун Йоркшир дахь Ностелл эдлэнд хадгалагддаг Томас Мор болон түүний гэр бүлийг дүрсэлсэн ховор бүтээлийг орчин үеийн шинжлэх ухааны аргаар олон нийтийн нүдэн дээр судлахаар болжээ.
Үндэсний сангаас хэрэгжүүлж буй энэхүү нээлттэй өв судлалын төсөл нь урлагийн бүтээлийг ихэвчлэн хаалттай лабораторид шинжилдэг уламжлалаас ялгаатай бөгөөд зочдод судалгааны үйл явцыг шууд ажиглах боломж олгож байгаагаараа онцлог юм.
Тус бүтээл нь Английн VIII Генри хааны лорд канцлер асан Томас Морын гэр бүлийн гурван үеийнхнийг дүрсэлсэн, 2.5 метр өндөр, 3.4 метр өргөн хэмжээтэй томоохон хөрөг юм.
Уг зураг нь XVI зууны нэрт зураач Ханс Холбейн Багагийн анхны бүтээлийн хамгийн үнэн, бодит хэмжээтэй хадгалагдан үлдсэн хувилбаруудын нэг гэж үздэг. Холбейны эх зураг 1752 онд гарсан гал түймэрт устсан ч түүний бэлтгэл зураг болон хэд хэдэн хуулбар өнөөг хүртэл хадгалагдан үлджээ.
Судалгааг Кембрижийн Фицвиллиам музейн “Hamilton Kerr Institute”-ийн мэргэжилтнүүд найман өдрийн турш явуулах бөгөөд тэд макро рентген флюоресценцийн сканнерын технологийг ашиглах юм. Энэхүү технологийн тусламжтайгаар судлаачид зургийн будагны давхаргын доорх нуугдсан дүрслэл, анхны ноорог зураг болон хожим хийгдсэн өөрчлөлтүүдийг илрүүлэхээр зорьж байна. Энэ нь Их Британид уг төрлийн шинжилгээг олон нийтийн өмнө хийж буй анхны тохиолдол болжээ. Судлаачдын үзэж буйгаар энэхүү шинжилгээ нь зөвхөн зургийн бүтэц, түүхийг илүү сайн ойлгоход төдийгүй Ностелл дахь хувилбарыг чухам хэн зурсан гэх олон жилийн нууцлаг асуултад хариулт өгөх боломжтой аж.
Томас Морын гэр бүлийн энэхүү хөрөг нь Английн урлагийн түүхэн дэх хамгийн эртний гэр бүлийн хөргүүдийн нэг гэж тооцогддог бөгөөд олон зуун жилийн турш урлаг судлаачдын анхаарлыг татсаар ирсэн юм.
