Өмнөд Солонгосын хөвгүүдийн хамтлаг BTS “Arirang” нэртэй дэлхийг тойрох аялан тоглолтынхоо Хойд Америк дахь хэсгийг дуусгажээ. Тус хамтлаг 12 хотод нийт 31 тоглолт хийсэн бөгөөд бүх тасалбар зарагдаж, 1.92 сая орчим хүн үзсэн байна.
Тус аялан тоглолтын Хойд Америк дахь хэсэг Лос-Анжелес хотын “SoFi Stadium”-д дөрвөн өдөр үргэлжилсэн тоглолтоор өндөрлөж, уг тоглолтыг 282 мянга орчим хүн үзэж, 177 улс оронд шууд дамжуулан хүргэсэн гэж BTS-ийн харьяалагддаг “BigHit Music” агентлаг мэдээлжээ. Өмнөх тоглолтуудыг нь оруулаад BTS тус цэнгэлдэх хүрээлэнд нийт найман удаа тоглолт хийж, 496 мянга шахам хүн үзсэн нь тус цэнгэлдэх хүрээлэнгийн түүхэн дэх хамгийн өндөр үзүүлэлт болсон байна.
Аялан тоглолтын үеэр BTS-ийн шүтэн бишрэгчид хамтлагийн нэг гишүүний төрсөн өдрийг тэмдэглэжээ. Өнгөрсөн долоо хоногийн мягмар гарагт Жонгүгт, ням гарагт буюу есдүгээр сарын 12-нд төрсөн өдрөө тэмдэглэх гэж буй RM-д зориулан төрсөн өдрийн дуу дуулсан байна. Тоглолт болсон цэнгэлдэх хүрээлэнг Жонгүгийн “Golden”, RM-ийн “Indigo” нэртэй бие даасан цомгуудын алтлаг шар болон цэнхэр өнгийн гэрлээр гэрэлтүүлжээ.
Хамтлагийн гишүүд аялан тоглолтоо хааж үг хэлэхдээ, өнгөрүүлсэн мөч бүр нь маш аз жаргалтай байсан учир агшин зуур өнгөрсөн мэт санагдсанаа, мөн хаана ч байсан шүтэн бишрэгчидтэйгээ үүрд холбоотой хэвээр байхыг хүсэж байгаагаа илэрхийлсэн байна.
Долоон гишүүнтэй тус хамтлаг Өмнөд Америкийг зорьсон бөгөөд аравдугаар сарын 2-нд Богота хотоос тоглолтоо эхлүүлснийхээ дараа Лима, Сантьяго, Буэнос-Айрес, Сан-Пауло хотуудад үргэлжлүүлнэ.
