Холливудын жүжигчин Майкл Ж.Фокс Паркинсоны өвчинтэй олон арван жил тэмцэж байгаа бөгөөд сүүлийн жилүүдэд нөхцөл байдал нь улам хүндэрсэн ч эдгэх найдвараа алдаагүй гэдгээ ярьжээ.
65 настай жүжигчин 29 насандаа Паркинсоны өвчтэй гэж оношлогдсон бөгөөд 1998 онд энэ талаарх мэдээллээ олон нийтэд дэлгэсэн юм. Тэрбээр 2000 онд Майкл Ж.Фоксын Паркинсоны судалгааны санг байгуулж, өвчний эмчилгээ болон эдгэрэх явцын судалгаанд анхаарлаа хандуулж эхэлсэн байна. Тус сан өнөөг хүртэл Паркинсоны судалгаанд 3 тэрбум гаруй ам.доллар зарцуулжээ.
“Мэдээж, олон жилийн туршид бүх зүйл улам хүндэрсэн” хэмээн Фокс ярьсан ч өвчнийг эмчлэхийн төлөө цаг хугацаа, эрч хүчээ зориулах боломжтой байгаадаа талархаж байгаагаа хэлжээ.
Түүний энэ үйлсийг үнэлж, “Ласкерын сан” түүнд “Lasker-Bloomberg Public Service Award” шагналыг олгосон байна. Фокс уг шагналыг зөвхөн өөрийнх нь бус, Паркинсоны өвчний эмчилгээний шинэ арга замыг эрэлхийлж буй судлаач, эмч, өвчтөнүүдийн хамтын амжилт хэмээн үзжээ.
Жүжигчин сүүлийн үед “Shrinking” цувралын гуравдугаар улиралд тоглож, жүжигчний ажилдаа эргэн ирсэн юм. Тэрбээр Паркинсоны өвчтэй дүрийг бүтээсэн нь өөрийн бодит амьдралын туршлагыг дүрдээ ашиглах боломж олгосон хэмээн ярьжээ.
