Академийн шагналт жүжигчин Гэри Олдман “Apple TV”-ийн “Slow Horses” цувралын наймдугаар улиралд Жэксон Ламбын дүрээ үргэлжлүүлэн бүтээнэ. “Apple TV” есдүгээр сарын 15-нд тус цувралыг найм дахь улирлаар үргэлжлүүлэхээ албан ёсоор зарлалаа.
Шинэ улирал зургаан ангитай байх бөгөөд Британийн зохиолч Мик Херроны “Slough House” цувралын ес дэх ном болох “Clown Town” зохиолоос сэдэвлэн бүтээхээр болжээ. Уг улирлын зохиолыг Бен Ванстоун телевизэд тохируулан бичиж, Адам Рэндалл найруулагчаар эргэн ажиллана.
Олдман тус цувралд MI5-ын “Slough House” хэмээх албанд ажилладаг, туршлагатай тагнуулч Жэксон Ламбын дүрийг бүтээдэг бөгөөд мөн цувралын гүйцэтгэх продюсероор ажилладаг. Тэрбээр уг дүрээрээ “Алтан бөмбөрцөг”, “Эмми” болон BAFTA-ийн шагналд нэр дэвшиж байжээ.
“Slow Horses” цувралд Гэри Олдманаас гадна Кристин Скотт Томас, Жек Лоуден нар гол дүрүүдэд тоглодог. Тус цуврал одоогоор гурван Эмми, таван BAFTA телевизийн шагнал хүртээд байна.
