“Херо” энтертайнментийн үүсгэн байгуулагч, найруулагч Б.Баатарт хилийн хориг тавьсанаас шалтгаалан “Тамгагүй төр” буюу “Монгол хаан” жүжгийн гадаад дахь зарим тоглолтууд цуцлагджээ. Тухайлбал, ОХУ-ын Москва хот, Турк болон Европын зарим улсад хийхээр товлогдоод байсан тоглолт, уулзалтууд цуцлагдсан байна.
Б.Баатарыг бусдыг хуурч, зохиомол байдлыг зориудаар бий болгож, бодит байдлыг нуух замаар төөрөгдөлд оруулж, эзэмшигч өмчлөгчийн эд хөрөнгийг шилжүүлэн авч залилах, мөнгө угаах, гэмт хэргүүдэд холбогдуулан эрүүгийн хэрэг үүсгэж яллагдагчаар татан мөрдөн шалгах ажиллагаа явуулж байгаа бөгөөд түүнийг Монгол Улсын хилээр гарахыг шүүхээс хязгаарласан. Хилийн хоригоо цуцлуулахаар хандсан Б.Баатарыг цагдан хорьж, мөрдөн шалгах шаардлагатай хэмээн прокурор үзсэн ч Дүүргийн Эрүү, Иргэний хэргийн хялбар ажиллагааны анхан шатны шүүхээс прокурорын саналыг хүлээж аваагүй ч, хилийн хориг хэвээр үлдээсэн юм.
Ташрамд сонирхуулахад, 2022 онд Б.Баатарын найруулгаар тоглогдож эхэлсэн “Монгол хаан” жүжгийг Монголдоо 151 удаа, Английн алдар “West End”-ийн тайзнаа 17 удаа, Сингапурын “Marina Bay Sands”-т 22 удаа, Японы Токио болон Нагояа хотод 23 удаа тогложээ. Мөн хамгийн сүүлд ОХУ-ын Марийнский театрын Приморскийн тайзнаа тоглоод буй.
